Fərhəng
Fərhəng (Mədənijət) – cy insoni u čəmjəti inkišafi myosirə səvijəje, insoni ofəjə kardə və nəsliku bə nəsl dəvardə maddi ijən mənəvi dəjəronin.
"Mədənijət" syxani latyni zyvonədə tərčuməš "culture" – kašte, perosnije, cok kardeje. Ym syxanon navko mənoš – zəmini kašte, zəminədə ko karde be. Tədričən insonon fəalijjət dairə hovuž be və “mədənijjət” syxanən məna dəmande čo mənaonənən yštə dylədə ehtiva karde: maarifpərvərəti, səvod, tərbijə.
Məšhur urusə zyvonšunas Vladimir Dal yštə “İzahinə luğət”ədə nyvyštedə: “Mədənijət – kašte, cicisə səpe ko kardeje, ym əgli ijan əxlaği səvode”.
Fərhəngi fenomeni təhlil kardə F. Hegel bəj “cy insoni tərəfo ofəjə byə dyminə təbiət” nomyš doəše. Fərhəng cy təbiəti tərəfo bəmə bəxš byə sətvəte, cy insonon tərəfo ofəjə byə ijan gyrdə byə maddi və mənəvi dəjəron, əməni əhatə kardə təbiəti gijməti zyneto bəmə doə byə šanse.
Fərhəng – cy sivilizasijaon ijən etnoson əsas čəhətonku gyləjnije. Cəmə planetədə cy fərhəngon muxtəlifəti inson ibemonon ən jolə dəjəre; bymi kali vaxton integral fərhəngən votedən. Inson de fərhəngi vasitə yštəmustəgil fərd, cy čəmijjəti uzv be dərk kardedə.