Jack Lemmon
| Jack Lemmon | |
|---|---|
| |
| Persovntiäđuh | |
| Šoddâm | kuovâmáánu 8. peeivi 1925 Newton, Massachusetts, Ovtâstum staatah |
| Jáámmám | kesimáánu 27. peeivi 2001 (76-ihásâžžân) Los Angeles, Kalifornia, Ovtâstum staatah |
| Karrieer | |
| Aktiivlâžžân | 1949–2001 |
| Palhâšumeh | |
| Almaiuálgiroolâ Oscar 1956 Mister Roberts | |
| Peerâ | |
| Pelikyeimi | Cynthia Stone (1950–1956) Felicia Farr (1962–2001) |
| Párnááh | 2 |
| Lasetiäđuh | |
| Nommâčáálus | 
|
| IMDb-sijđo | IMDb |
John Uhler Lemmon III (8. kuovâmáánu 1925 Newton, Massachusetts, Ovtâstum staatah – 27. kesimáánu 2001 Los Angeles, Kalifornia, Ovtâstum staatah)[1] lâi ovtâstumstaatâlâš čaittâleijee, stivrejeijee já pyevtitteijee.[1] Sun lii vuáittám maaŋgâid palhâšuumijd, ovdâmerkkân kyehti Oscar-palhâšume já maaŋgâid Golden Globe -palhâšuumijd.[2] Ive 1988 American Film Institute palhâšij Jack Lemmon Life Achievement Award -palhâšuumijn,[1] já ive 1991 American Comedy Awards palhâšij suu Lifetime Achievement in Comedy -palhâšuumijn.[3]
Eellim
[mute | mute käldee]Jack Lemmon šoodâi Newtonist, Massachusettsist, jiešalnees Newton-Wellesley pyecceeviäsu hiisist. Suu enni lâi Mildred Burgess LaRue Noel Lemmon já suu eeči lâi John Uhler Lemmon Jr. Jack eeči lâi muŋkkisiärvus toimâttâshovdâ. Jack vanhimij näimilitto lâi uáli nirráá, já tot vaiguttij sunjin. Jack lâi perruu áinoo páárnáš.[4]
Jack Lemmon puosâi ennuv párnážin. Ovdil ko sun lâi tiävdám love ihheed, sun lâi jo čuopâdum kulmii. Ko Jack puáránij, sun aalgij hárjuttâllâđ valastâllâm já sun miänástui eres lasseen kaččâmist kuhes maađhijn. Rävisolmožin-uv Jack valastâlâi ennuv: sun speelâi golf, kuálástij já vandârdij jieijâs olgijn Alaskast jyehi ive.[4]
Jack Lemmon juuđij vuáđuškoovlâ sehe John Ward -vuáđuškoovlâst Newtonist já The River -škoovlâst Westonist Massachusettsist.[5] Ko Jack Lemmon valmâštui Phillips Academyst Andoverist Massachusettsist, sun algâttij uápuid Harvard ollâopâttuvvâst, kost sun tooimâi pivnohis teatterkerho Hasty Pudding Club saavâjođetteijen. Sun čaittâlij toin naalijn, et lâi kárvudâttâm nisonin já čaalij lavluid kerho ihečaitâlmáid.[3][4] Ive 1945 Jack Lemmon koskâldutij uápuidis suátivievâ keežild. Sun palvâlij kulmâ mánuppaje vyeliluutnantin tieđetteijen USS Lake Champlain -kirdemcoggâskiijpâst olgoenâmijn.[3]
Suátivievâ maŋa Jack Lemmon maacâi Harvard ollâopâttâhân, kost sun valmâštui ive 1947. Ton maŋa sun varrij New Yorkân 300 dollarid lumâstis. Suu eeči lâi luoikkâm ruuđâid sunjin. New Yorkist Jack Lemmon poorgâi pianočuojâtteijen baarijn já elettij jieijâs tánávt.[4] Sun máttááttâlâi čaittâlem Uta Hagen stivriimist.[6] Sun čaittâlij meid radiokuldâlmâsâin já televisio-ohjelmijn.[1] Ive 1948 Jack Lemmon finnij roolâ radio saibâoopperast, já váhá ton maŋa aalgij viiđâ ive paje, mon ääigi sun čaittâlij teikâ lâi mudoi joba 400 kerdid uđđâ mediast ađai televisiost. Talle sun teeivâi jieijâs puáttein pelikuoimijn, čaittâleijee Cynthia Stonein. Suoi láin naaijâm kuttâ ive ovdil ko suoi iäránáin. Sunnuu algeest Christopherist šoodâi meid maŋeláá čaittâleijee.[4] Ive 1962, ko Jack Lemmon lâi Irma La Douce -elleekove kuvviimist Ranskaast, sun naajâi nubbijn pelikuoimijnis Felicia Farráin. Sunnui šoodâi nieidâ, Courtney.[7] Jack Lemmonist lâi meid ááijuv, suu alge nieidâ, Sydney Lemmon.
Pirâssuojâlem já elleevuoigâdvuođah lijjii alda Jack Lemmon vááimu. Maaŋgâs suu ustevijn muštii suu čapis Chloe-pennuu, mii lâi távjá Jack Lemmon fáárust kuvvimsoojijn. Golf lâi nubbe äšši, maid Jack Lemmon rähistij čuuvtij. Pargokyeimih lijkkojii Jack Lemmonân uáli ennuv já onnii suu áárvust sehe olmožin já čaittâleijen. Jack Lemmon jaamij 76-ihásâžžân purâstaavdân.[4] Suu elimist láá meid čallum maŋgâ kirje.[7]
Karrieer
[mute | mute käldee]
Jack Lemmon lávdástij vuosmuu tove jo neelji-ihásâžžân. Sun lávdástij ejijnis, kiän puđâldâsah lijjii tánssám já lávlum.[4]
Jack Lemmon čaittâlij meid Harvardist, já oovtâ sahhiittâlmist sun muštâlij, ko sun lâi uážžum hirmâd hyenes árvuštâlmijd The Harvard Crimson -aavisist ive 1944. Čaaitâlm lâi "Desire Under the Elms", já aavisist lâi čallum, ete Jack Lemmon kolgâččij vuáijuđ ruttâtuálun ige čaittâlmân.[8]
Jack Lemmon lâi maaŋgâpiälálâš čaittâleijee. Sun čaittâlij nuuvt elleekuuvijn, čaitâlmijn Broadwayst, televisiorááđuin ko radiokuldâlmâsâin-uv. Jack Lemmon maatij čaittâliđ sehe komedia- já draamaroolijd. Sun čaittâlij vuosmuu tove elleekooveest The Lady Takes a Sailor ive 1949. Broadway-čaitâlmijn vuosmuš lâi ive 1953 Room Service. Eres Broadway-čaitalmeh lijjii Face of a Hero (1960), Tribute (1978) já Long Day’s Journey Into Night (1986). Jack Lemmon tooimâi meid muštâleijen já adelij jienâs sárgusháámán The Simpsons -sárgusrááiđust.[9]
Palhâšumeh
[mute | mute käldee]Jack Lemmon palhâšui čaittâleijen maŋgâi palhâšumijgijn. Elleekoveroolâin Jack Lemmon vaaldij vuástá kyehti Oscar-palhâšume: ive 1956 sun vuoitij almaiuálgiroolâ Oscar elleekooveest "Mister Roberts", já ive 1974 sun vuoitij almaiuáiviroolâ Oscar elleekooveest "Save the Tiger". Sun lâi meid Oscar-iävtukkâssân kuttâ tove. Toi lasseen Jack Lemmon lii váldám vuástá elleekuuvijn kuttâ Golden Globe -palhâšume já kyehti Primetime Emmy -palhâšume. Sun palhâšui meid AFI Life Achievement -palhâšuumijn ive 1988 já Kennedy Center Honors -palhâšuumijn ive 1996.[10]
Televisiopargoost Jack Lemmon vaaldij vuástá ive 1999 Primetime Emmy -palhâšume "Eromâš uálgiroolâ čaittâleijee" -kategoriast televisioelleekooveest "Tuesdays with Morrie". Jack Lemmon lâi meid neljii Emmy-palhâšumeiävtukkâssân. Broadway-čaitâlmijn sun palhâšui kuohtii Tony-palhâšuumijn ive 1978 já 1978 pyeremussân čaittâleijen.[10] Toi lasseen Jack Lemmon finnij uáli maaŋgâid palhâšuumijd.[2]
Filmografia
[mute | mute käldee]- Válduartikkâl: Jack Lemmon filmografia
Diskografia
[mute | mute käldee]- A Twist of Lemmon (Eic, 1958)
- Some Like It Hot (1959)
- "Daphne"/"Sleepy Lagoon" (single, 1959)
- "I'm Forever Blowing Bubbles"/"I Cover the Waterfront" (single, 1960)
- "The Apartment"/"Lemmon Blues" (single, 1960)
- Jack Lemmon Plays Piano Selections from "Irma La Douce" (Capitol, 1963)
- Piano and Vocals (1990)
- Peter and the Wolf (1991)
- A Twist of Lemmon/Some Like It Hot (2001)
Fáádást eres soojijn
[mute | mute käldee]Jack Lemmon.
- Jack Lemmon Internet Movie Databasest (eŋgâlâskielân)
Käldeeh
[mute | mute käldee]- ↑ a â b c Jack Lemmon www.britannica.com. 4.2.2025. Čujottum 20.3.2025. (eŋgâlâskielân)
- ↑ a â Jack Lemmon - Awards IMDb. Čujottum 20.3.2025. (eŋgâlâskielân)
- ↑ a â b Jack Lemmon The Kennedy Center. Čujottum 20.3.2025. (eŋgâlâskielân)
- ↑ a â b c č d đ Krikorian, Greg: From the Archives: Jack Lemmon, Everyman Star, Dies Los Angeles Times. 29.6.2001. Čujottum 20.3.2025. (eŋgâlâskielân)
- ↑ Jack Lemmon Hollywood Walk of Fame. 25.10.2019. Čujottum 21.3.2025. (eŋgâlâskielân)
- ↑ Uta Hagen: Master Teacher HB Studio. Čujottum 21.3.2025. (eŋgâlâskielân)
- ↑ a â Lemmon, John Uhler, III ("Jack") www.encyclopedia.com. Čujottum 21.3.2025. (eŋgâlâskielân)
- ↑ Lear, Len: The class act that was Jack Lemmon never grows old The Chestnut Hill Local. 9.11.2023. Čujottum 21.3.2025. (eŋgâlâskielân)
- ↑ Jack Lemmon TVGuide.com. Čujottum 21.3.2025. (eŋgâlâskielân)
- ↑ a â Jack Lemmon www.broadwayworld.com. Čujottum 22.3.2025. (eŋgâlâskielân)